የኢፌዴሪ መከላከያ ሠራዊት ጥቅምት 03 ቀን 2018 ዓ.ም

“ሠንደቅ ዓላማችን ለኢትዮጵያ ታላቅ የከፍታ ዘመን ብሥራት፣ ለብሔራዊ አንድነታችን፣ ለሉዓላዊነታችንና ለኢትዮጵያ ሕዳሴ” በሚል መሪ ሃሳብ ብሄራዊ የሠንደቅ ዓላማ ቀን በመከላከያ ሚኒስቴር ጠቅላይ መምሪያ ተከብሯል።

በዕለቱ በክብር እንግድነት የተገኙት ጀኔራል ጌታቸው ጉዲና የብሔራዊ ሰንደቅ ዓላማ ከፍታ  ከሀገራዊ ክብርና ማንነት ጋር በቀጥታ የተቆራኘ በመሆኑ የሀገር ክብር የሚረጋገጠው ደግሞ ብሔራዊ ጥቅሞቻችን በተሟላ መንገድ ሲጠበቅ ነው ብለዋል።

ታሪካዊ ጠላቶቻችን በቻሉት ሁሉ የሀገራችንን ብሔራዊ ጥቅም በመፃረር በእጅ አዙር የውስጥ ባንዳዎችን በማደራጀት እና በመደገፍ ሲውተረተሩ ይስተዋላሉ ያሉት ጀኔራል መኮንኑ ተላላኪ ባንዳዎችም የተሰጣቸውን አጀንዳና እኩይ አላማ ለማስፈፀም ከዚህም ከዚያም በትጥቅ እንቅስቃሴ ቢያደርጉም ከንቱ ምኞታቸው መክኗል ሲሉ ገልፀዋል።

ጄኔራል ጌታቸው ጉዲና ሀገራችን ኢትዮጵያም በዚህ ትውልድ ዘመን ከህዝቦቿ እና ከሠራዊቷ ጋር ሆና ወደ ከፍታ ዘመን ትሸጋገራለች ነው ያሉት።

ሠንደቅ ዓላማ እና ሠራዊታችን ከቃል እስከ ህይወት መስዋዕትነት የተገመደ ትስስር አላቸው ያሉት ጀኔራል ጌታቸው ጉዲና የሀገራችን መንግስትና ህዝብ ያነገቡትን ሀገራዊ ጥቅም የማረጋገጥ አጀንዳ እውን ለማድረግ እኛ የሠራዊት አመራሮችና አባላት የተጣለብንን ሀላፊነት በላቀ ደረጃ በመፈፀም በሠንደቅ ዓላማችን ስር የገባነውን ቃል በተግባር ላይ ልናውል ይገባልም ሲሉ መልዕክት አስተላልፈዋል።