የኢፌዴሪ መከላከያ ሠራዊት መስከረም 12 ቀን 2019 ዓ.ም
ኢትዮጵያ ትልቅ ክብር ሰጥታኛለች፥ ለሀገሬ የምሰስተው ነገር የለም ሲሉ የጦር ኃይሎች ጠቅላይ ኤታማዦር ሹም ፊልድ ማርሻል ብርሃኑ ጁላ ተናገሩ፡፡
በፊልድ ማርሻል ብርሃኑ ጁላ የሕይወትና የውትድርና ጉዞ ላይ የሚያጠነጥነው “ድል ቁርሱ” የተሰኘ መጽሐፍ በዛሬው ዕለት ተመርቆ ለንባብ በቅቷል፡፡
ፊልድ ማርሻል ብርሃኑ ጁላ በዚሁ ወቅት እንዳሉት፤ የጀግኖችን ታሪክ በመፃፍ፤ ጀግኖችን በማወደስ ትውልድ ይገነባል፡፡
ኢትዮጵያ ትልቅ ክብር ሰጥታኛለች፤ እኔም ለሀገሬ የምሰስተው አንዳች ነገር የለም ያሉት ጠቅላይ ኤታማዦር ሹሙ፤ መጽሃፉ ለዩኒቨርሲቲዎች፣ ለሀገር መከላከያ ሠራዊት እንዲሁም ለታሪክ ተመራማሪዎች የሚጠቅም መሆኑን አንስተዋል፡፡
ድል ቁርሱ መፅሃፍ ከኩየራ ወንዞች መሐል የፈለቀዉ የጦር ሊቅ በሚል ርዕስ በጦር ኃይሎች ጠቅላይ ኤታማዦር ሹምና ወደር የሌለው የጥቁር አንበሳ ጀግና ሜዳይ ተሸላሚ ፊልድ ማርሻል ብርሃኑ ጁላ የህይወት ታሪክ ላይ ያተኮረ መፅሐፍ ነው።
ወታደራዊ ሁኔታን ከማንበብ እስከ ውጤታማ የድል ምዕራፍ ድረስ በማያቋርጥ የአመራር ሰንሰለት ዉስጥ ያለፉት ፊልድ ማርሻል ብርሃኑ ጁላ ከሁሉም በላይ ሀገር እና ህዝብን ላስቀደመ ዓላማ ዕምቅ ወታደራዊ ሙያቸውን ያለ መታከት ያበረከቱበት እውነተኛ ታሪክ በመፅሃፉ ተካቷል።
በአማን ታደሰ ተፅፎ ለንባብ የበቃው መፅሃፉ ከጠቅላይ ኤታማዦር ሹሙ በጀግንነት የደመቀ ታሪክ ትውልድ እንዲማርበት በማድረግ በኩል የሚያበረክተው አሰተዋጽኦ ከፍተኛ መሆኑን በመፅሃፉ ዙሪያ ምልከታቸውን የጋሩ ዶክተር ዳኛቸው አሰፋ ሃያሲ ብርሃኑ ደቦጭ የአፍሪካ አመራር ልህቀት አካዳሚ ፕሬዚዳንት አቶ ዛዲግ አብርሃ እና ረዳት ፕሮፌሰር አበባው አያሌው በመፅሃፉ ላይ ያላቸዉን ምሁራዊ ዕይታ ለፕሮግራሙ አቅርበዋል
በመጽሐፉ የምረቃ ሥነ-ሥርዓቱ ላይ ምክትል ጠቅላይ ሚኒስትር አቶ ተመስገን ጥሩነህ፣ የጦር ኃይሎች ጠቅላይ ኢታማዦር ሹም ፊልድ ማርሻል ብርሃኑ ጁላ፣ የኢፌዴሪ የቀድሞ ፕሬዝዳንት ሙላቱ ተሾመ (ዶክተር)፣ ከፍተኛ ጄኔራል መኮንኖች፣ የመንግሥት ከፍተኛ የሥራ ኃላፊዎች፣ የዲፕሎማቲክ ማኅበረሰብ አባላት እና ጥሪ የተደረገላቸው እንግዶች ተገኝተዋል።
በወንድማገኝ ታደሠ
የኢፌዴሪ መከላከያ ሠራዊት
https://dfmc.mod.gov.et/