የመከላከያ ኢንጂነሪንግ ኢንዱስትሪ ግሩፕ (መኢኢግ) እና የኢትዮጵያ ኢንቨስትመንት ሆልዲንግስ (ኢኢሆ) በሁለቱ ተቋማት መካከል ያለውን ትስስርና ትብብር ለማጠናከር የሚያስችል የመግባቢያ ስምምነት ተፈራረሙ።
በኢኢሆ ዋና መሥሪያ ቤት በተካሄደው ሥነ-ሥርዓት ስምምነቱን የመከላከያ ኢንጂነሪንግ ኢንዱስትሪ ግሩፕን በመወከል የግሩፑ ምክትል ዋና ሥራ አስፈፃሚ ብርጋዲየር ጄኔራል ዮሃንስ ትኬሳ፣ ኢትዮጵያ ኢንቨስትመንት ሆልዲንግስን በመወከል ደግሞ የተቋሙ ዋና ሥራ አስፈፃሚ ዶክተር ብሩክ ታዬ ፈርመዋል።
በስምምነቱ መሠረት ሁለቱ ተቋማት በአቅርቦት ሰንሰለት ማጠናከር፣ በሰው ኃይል አቅም ግንባታ፣ በፋይናንስ ውጤታማነት፣ በምርምር፣ ፈጠራና የእውቀት አስተዳደር እንዲሁም በገበያ ትስስር ዘርፎች በጋራ ይሰራሉ። ትብብሩ የሁለቱን ተቋማት የጋራ አቅም ለሀገራዊ ልማት ለማዋል ያለመ ነው።
ስምምነቱን ተግባራዊ ለማድረግ በቀጣይ የሚሰሩ ስራዎች ላይ ውይይት የተደረገ ሲሆን በሥነ-ሥርዓቱ ላይ የሁለቱም ተቋማት ከፍተኛ አመራሮችና ባለሙያዎች ተገኝተዋል።
